Os deputados do Grupo Provincial Popular denuncian o estado de abandono no que se atopa o polígono industrial de Ourol no que o Goberno provincial “nin sequera realizou o desmonte das parcelas”. Os deputados populares Antonio Ameijide e Demetrio Salgueiro visitaron esta zona industrial acompañados do voceiro popular na localidade, José Hermida, ademais de outros membros do PP de Ourol.
“Vaia forma máis curiosa teñen PSOE e BNG de apostar polo asentamento industrial na provincia”, sinalaron. O voceiro popular, Antonio Ameijide, explica que no polígono hai dúas parcelas. Unha delas conta cunha nave abandonada, “seguramente froito dos nulos avances para que chegaran outras empresas a este polígono”, sinalou, ao que engade que imaxinan que “marcharían a outra localización na que houbera máis empresas para gañar en competitividade”.
A segunda das parcelas, cunha extensión de 14.330,00 m2 “non está nin dividida nin con desmonte feito”. Trátase dunha parcela repleta de árbores e maleza, ademais de rochas de gran tamaño. “Non está nin adaptada, o normal é que inguén se interesase por ela nesas condicións”, indicou. Ameijide ve neste polígono “outro exemplo máis da nefasta política industrial” de José Tomé, do PSOE e do BNG. “Ao longo da provincia temos numerosos exemplos”, lamentou.
Denuncian a falta de impulso
Poñen como exemplos o polígono de Castroverde, no que aseguran que a falta de impulso á venda de parcelas provocou que sexan solares que se empregan como acopio de material de obra e para que medre a maleza, ou o da Fonsagrada, no que desde que se anunciou a súa construción en 2009 nada se fixo e a parcela segue completamente chea de vexetación.
Desde o Grupo Provincial Popular recordan que o sistema de venda das parcelas aprobado pola Deputación foi mediante poxa, á que ninguén concorreu. “Declara deserto o procedemento convocado para o alleamento, mediante poxa, das parcelas de solo industrial, propiedade da Deputación Provincial de Lugo, no Polígono Industrial O Pousadoiro, no Concello de Ourol ao non recibirse ofertas para concorrer a este procedemento”.
Pese a isto, se hai algún interesado en adquirir as parcelas ten que presentar un escrito na deputación solicitando a compra e o prezo das mesmas será o da poxa, aplicando as condicións de financiación de SUPLUSA (financiación ao interese legal, máximo 5 anos, pago mensual ou trimestral).
