Vigo estrea un concurso internacional de piano para impulsar o talento das novas xeracións
O Conservatorio Superior de Música de Vigo acolle desde este martes a primeira edición do Concurso Internacional de Piano "Vigo Junior", unha iniciativa creada para ofrecer un espazo de proxección aos novos intérpretes e fomentar o desenvolvemento do talento musical desde as primeiras etapas da formación.
A apertura do certame contou coa participación da delegada territorial da Xunta en Vigo, Ana Ortiz, quen destacou o valor desta proposta como unha plataforma para descubrir e apoiar ás futuras promesas do piano. A representante autonómica subliñou o compromiso da Xunta co impulso de actividades culturais que contribúan a fortalecer a oferta musical da cidade.
O novo concurso servirá ademais como antesala da X edición do Concurso Internacional de Piano "Cidade de Vigo", unha cita que este ano acadou unha participación histórica, con preto de 400 pianistas procedentes de 77 países dos cinco continentes.
A programación oficial arrancará o 7 de agosto cun recital protagonizado polos gañadores do certame júnior e co concerto inaugural, no que actuarán a recoñecida pianista Martha Argerich e o músico galego Pablo Galdo.
Entre as actividades máis destacadas figura tamén a interpretación de O Entroido dos Animais, de Camille Saint-Saëns, que contará coa narración do actor británico Jeremy Irons, gañador dun premio Óscar.
O concurso culminará o 14 de agosto no Auditorio Mar de Vigo coa gran final, na que os finalistas actuarán acompañados pola Orquestra Sinfónica de Galicia, poñendo o broche a unha edición que reforza a proxección internacional da cidade no ámbito da música clásica.